विराटनगर:सप्तकोशी नदीमा मोटरबोट पल्टिँदा तीन जना यात्रुको मृत्यु भएको छ ।

आइतबार दिउँसो भोजपुरको कोप्चेबाट यात्रु बोकेर सुनसरीको बराहक्षेत्रतर्फ आउँदै गरेको मोटरबोट धनकुटा, उदयपुर र भोजपुरको संगमस्थल त्रिवेणी नजिकै दुर्घटनामा परेको हो ।प्रहरीका अनुसार दुर्घटनामा मृत्यु भएका तीनै जनाको पहिचान खुल्न सकेको छैन । मृत्यु हुनेमा एक जना ५ वर्षीया बालिका, ३५ वर्षीया महिला र ४० वर्षीय पुरुष रहेका छन् । मोटरबोटका चालक सुमन मगर भने पौडिएर बाहिरिएको प्रहरीले जनाएको छ । चालकलाई प्रहरीले नियन्त्रणमा लिएको जनाएको छ ।दुर्घटनामा परेको मोटरबोटमा कति जना यात्रु सवार थिए भन्ने यकिन हुन सकेको छैन। दुर्घटनास्थल धनकुटा क्षेत्रमा पर्ने भए पनि उद्धारका लागि सुनसरीको बराहक्षेत्रबाट प्रहरी टोली खटिएको छ ।

धनकुटाबाट उद्दारका लागि भौगिक अवस्थाले गर्दा समय लाग्ने भएकोले बराहक्षेत्रको प्रहरी टोलीले उद्धार गरिरहेको बताइएको छ ।घटनाबारे विस्तृत विवरण आउन बाँकी छ । नेपाल प्रहरीका साथै सशस्त्र प्रहरीको उद्धार टोली पुगेर काम थालेको बताइएको छ । प्रहरीका अनुसार ११ जनाको टिकट काटेको देखिए पनि मोटरबोटमा १६ जना यात्रु सवार रहेको भनिएको छ । तर, यात्रु सवार संख्या पुष्टि हुन सकेको छैन ।दुर्घटनाको कारण, मोटरबोटमा सवार यात्रुको वास्तविक सङ्ख्या तथा अन्य विवरणबारे प्रहरीले थप अनुसन्धान गरिरहेको जनाएको छ । मृतक तीनको शव चतरा अस्पतालमा राखिएको प्रहरीले जनाएको छ ।