काठमाडौं:विश्वको सर्वोच्च शिखर सगरमाथा तथा लोत्से हिमाल सफलतापूर्वक आरोहण गर्ने सशस्त्र प्रहरी बल नेपालका दुई महिला कर्मचारीलाई एक तह बढुवा दिइने भएको छ ।
सशस्त्र प्रहरी सहायक निरीक्षक (असई) निमदिकी शेर्पालाई तत्काल बढुवा प्रक्रिया अघि बढाइएको सशस्त्र प्रहरीले जनाएको छ । यस्तै,सगरमाथा आरोही सशस्त्र प्रहरी सहायक हवलदार अनिता कार्कीलाई आवश्यक सेवा अवधि पूरा भएपछि हवलदार पदमा बढुवा गरिने भएको छ । सशस्त्र प्रहरी बल नेपाल प्रधान कार्यालय हलचोकमा आयोजित सम्मान कार्यक्रममा सशस्त्र प्रहरी महानिरीक्षक नारायण दत्त पौडेलले दुवै महिला आरोहीलाई बधाई दिँदै उनीहरूले राष्ट्र र संगठनको झण्डा विश्वको सर्वोच्च शिखरमा फहराएर गौरव बढाएको बताए ।उनले कठिन परिस्थितिमा समेत उच्च आत्मबलका साथ हिमाल आरोहण सम्पन्न गर्नु सशस्त्र प्रहरी संगठनकै लागि प्रेरणादायी उपलब्धि भएको उल्लेख गरे । यस्तो सफलताले संगठनभित्र कार्यरत अन्य सुरक्षाकर्मीमा पनि उत्साह र आत्मविश्वास थपिएको उनको भनाइ थियो ।
सम्मान कार्यक्रममा निमदिकी शेर्पा र अनिता कार्कीले सगरमाथामा राष्ट्र र संगठनको झण्डा फहराउन पाउनु आफ्नो जीवनकै गौरवपूर्ण क्षण भएको प्रतिक्रिया दिएका थिए । सफल आरोहणका लागि सहयोग गर्ने सम्पूर्णप्रति उनीहरूले आभार व्यक्त गरेका छन् । अनिता कार्कीले जेठ ३ गते बिहान सगरमाथा आरोहण गरेकी थिइन् भने निमदिकी शेर्पाले सोही दिन सगरमाथा र भोलिपल्ट लोत्से हिमालसमेत सफलतापूर्वक आरोहण गरेकी थिइन् । सशस्त्र प्रहरी बल नेपालको इतिहासमा सगरमाथा आरोहण गर्ने उनीहरू पहिलो महिला कर्मचारी बनेका छन् ।