फिफा विश्वकप छनोट २०२६ र एएफसी एसियन कप २०२७ को संयुक्त छनोटको दोस्रो चरणमा नेपालले आज अन्तिम खेल खेल्दै छ । समूह चरणको ५ वटै खेल हारेको नेपालले आज यमनसँग अन्तिम खेल खेल्न लागेको हो ।
समूह एचमा रहेको नेपालले ५ वटै खेल हारिसकेको हुँदा छनोटबाट बाहिरिएको भएपनि आजको खेल भने प्रतिष्ठाको लागि मात्रै महत्वपूर्ण छ ।
यमनको घरेलु मैदानमा हुनुपर्ने यस खेल न्युट्रल भेन्यु साउदी अरेबियाको दम्मानस्थित प्रिन्स मोहम्मद फहद स्टेडियममा हुनेछ । खेल नेपाली समय अनुसार राति पौने १२ बजे हुने छ । छनोट चरणका कुनै पनि खेलमा नेपालले गोल समेत गर्न सकेको छैन् ।
नेपाल र यमन समानस्तरको भएपनि यसअघि नेपाल घरेलु मैदानमा खेल्दा २-० ले पराजित भएको थियो । केही दिनअघि साउदीमै भएको यूएईविरुद्धको खेलमा नेपाल ४-० ले पराजित भएको थियो ।
समूहको पहिलो खेलमा पनि नेपाल अवे मैदानमा यूएईसँग ४-० ले पराजित भएको थियो । त्यसपछि घरेलु मैदानमा यमनसँग पराजित भयो । बहराइनविरुद्ध होम एण्ड अवे दुवै खेल बहराइनमा खेलेको नेपाल क्रमश: ५- ० र ३-०ले पराजित भएको थियो ।
पाँच खेलमा कुल १८ गोल खाएको नेपालले अहिलेसम्म गोल गर्न सकेको छैन । त्यसैले यमनविरुद्ध खेल्दा नेपालको लक्ष्य गोल गर्ने र अंक जोड्नेमा हुनेछ । समूहको अन्तिम खेलमा सुखद नतिजाका ल्याउने लक्ष्यमा नेपाल छ ।
इटालियन प्रशिक्षक एनेसको लागि पनि यमनविरुद्धको खेल अन्तिम बन्न सक्छ । अखिल नेपाल फुटबल संघ एन्फासँग हालको सम्झौता अनुसार उनको कार्यकाल यही जेठ अन्तिममा सकिंदैछ ।
यमन नेपालकै स्तरको टोली भएपनि उसले पछिल्लो खेलमा बहराइनसँग पछिल्लो खेल गोलरहित बराबरी खेलेको थियो ।