सिरहा:सिराहाको लहान नगरपालिकास्थित हस्पिटल चोकमा गोली हानेर ६ जनालाई पक्राउ गरिएको छ ।
लागुऔषध कारोबारीलाई नियन्त्रणमा लिन प्रहरीले गोली चलाएको हो ।कारबाहीका क्रममा ५ जना भारतीय र १ जना नेपाली नागरिक पक्राउ परेका छन् । लागुऔषध नियन्त्रण ब्यूरो कोटेश्वरबाट खटिएको टोलीले बिहीबार दिउँसो विशेष सूचनाका आधारमा उनीहरूलाई नियन्त्रणमा लिने क्रममा गोली चलाएको हो । पक्राउ परेकाहरूको साथबाट लागुऔषध खैरो हेरोइन (ब्राउन सुगर) २२५ ग्राम बरामद भएको प्रहरीले जनाएको छ ।
प्रहरीका अनुसार पक्राउ गर्ने क्रममा भाग्न खोजेपछि गोली चलाइएको थियो । घटनामा १ भारतीय र १ नेपाली नागरिकको खुट्टामा गोली लागेको छ । दुवै जनाको उपचार भइरहेको प्रहरीले जनाएको छ ।घटनापछि प्रहरीले विस्तृत अनुसन्धान अघि बढाएको छ । पक्राउ परेकाहरूको परिचय र लागुऔषध कारोबारसँग सम्बन्धित अन्य विवरण अनुसन्धानपछि सार्वजनिक गरिने प्रहरीले जनाएको छ ।