काठमाडौं । अमेरिकी पूर्वराष्ट्रपति डोनाल्ड ट्रम्पले हत्या गर्ने उदेश्यले आफूमाथि गोली प्रहार भएको बताउनुभएको छ । ‘न्युयोर्क पोस्ट’सँगको कुराकानीमा उहाँले यस्तो दाबी गर्नुभएको हो । आक्रमणमा मारिने सम्भावना’बाट उम्केको उहाँले प्रतिकृया दिनुभयो ।
रिपब्लिकन नेसनल कन्भेन्सनमा भाग लिन मिल्वौकी जाने क्रममा विमानमा सवार ट्रम्पले ‘न्युयोर्क पोस्ट’लाई दिएको अन्तर्वार्तामा आफूलाई बचाउन सुरक्षा अधिकारी र अभियानमा सहभागी शुभेच्छुकले खेलेको भूमिकाको प्रशंसा गर्नुभयो ।
शनिबार एक चुनावी र्यालीमा सहभागी हुने क्रममा बन्दुकधारीले प्रहार गरेको गोलीले ७८ वर्षीय ट्रम्पको कानलाई छोएर थियो । आक्रमणबाट उहाँको अनुहार रगताम्य भएको, एकजना दर्शकको मृत्यु भएको र अन्य दुईजना घाइते भएका थिए ।
ट्रम्पले र्यालीलाई सम्बोधन गर्ने क्रममा अवैध आप्रवासीसम्बन्धी चार्ट पढ्न आफ्नो टाउको दायाँतिर नझुकेको भए आफ्नो मृत्यु हुने बताउनुभएको हो ।
गोली प्रहार गर्ने आक्रमणकारीलाई तत्काल ‘सफाया’ गरेकामा उहाँले गुप्तचर सेवाका एजेन्टको प्रशंसा गर्नुभयो ।