इटहरी । नेकपा एमाले सुनसरीको आठौँ जिल्ला अधिवेशन आजबाट सुरु भएको छ । इटहरीमा हुने अधिवेशनको एमालेका वरिष्ठ उपाध्यक्ष ईश्वर पोख्रेलले उद्घाटन गर्नुभयो ।
आजबाट ३ दिन सम्म चल्ने अधिवेशनमा जम्मा ७ सय ३० प्रतिनिधि सहभागी छन् । अधिवेशनमा भूगोल र जन सङ्गठनहरूबाट प्रतिनिधि चुनिएर आएका छन ।
यसरी छनोट गर्दा प्रतिनिधिको सङ्ख्या कुनै इकाईमा ३ जना भए त्यसमा एक जना महिला अनिवार्य गरिएको छ । प्रतिनिधि छनोट गर्दा अनिवार्य ३३ प्रतिशत महिला अनिवार्य हुनु पर्ने कार्यविधिले व्यवस्था गरेको थियो । जिल्लाभर रहेका २३ वटा जनसङ्गठनहरूबाट १०१ जना प्रतिनिधि चुनिएका छन ।
पार्टी केन्द्रीय अध्यक्ष केपी शर्मा ओली सर्वसम्मत नेतृत्व चयनका लागि निर्देशन दिए पनि सुनसरीमा सर्वसम्मत नेतृत्व चयनको सम्भावना टर्दै गएको छ ।
सुनसरी अध्यक्षका लागि पार्टीका निलम खनाल र खेमराज पोख्रेलले आकंक्षा देखाउनुभएको छ । दुवै जनाले एक अर्काको नेतृत्व स्वीकार नगरेपछि सुनसरीको नेतृत्व छनौट चुनावी प्रक्रियाबाट हुने देखिएको छ ।
अध्यक्षको आकांक्षी खेमराज पोख्रेल यस अघि सातौँ जिल्ला अधिवेशनमा पनि पराजित हुनुभएको थियो । पोखरेल रेवतीरमण भण्डारीसँग पराजित हुनु भएको हो । निलम खनाल भने हाल उपाध्यक्ष हुनुहुन्छ ।