भोजपुर, १७ बैशाख । भोजपुरको दक्षिणमा रहेको आमचोक गाउँपालिकाको केन्द्र बालंखाबाट मैयुटार जाँदै गरेको वुलेरो दुर्घटनामा दुई जनाको मृत्यु भएको छ भने १२ जना गम्भीर घाइते भएका छन । यात्रुहरुसवैको पहिचान खुलेको छ ।
१४ जना यात्रु लिएर सोमवार बिहान बांलखाबाट हिडेको को १ ज २६१७ नम्बरको बुलेरो गाडी दुर्घटना हुदाँ दुई जनाको मृत्यु भएको छ भने गम्भीर घाइते १२ जनाको धरान स्थित बिपी कोइराला स्वास्थ्य बिज्ञान प्रतिष्ठानमा उपचार भई रहेको जिल्ला प्रहरी कार्यालय भोजपुरका सुचना अधिकारी दल कुमार राईले जानकारी दिनुभयो । घाइतेहरुलाई उपचारका लागि पानी जहाज मार्फत चतरा हुदै धरान पठाइएको थियो ।
प्रहरी निरीक्षक राईका अनुसार आमचोक गाउँपालिका वडा नम्वर १० का २७ बर्षिया रुना राईको घटनास्थलमा नै मृत्यु भएको हो । यस्तै ३६ बर्षीया शान्ति राईको उपचारको क्रममा धरानमा मृत्यु भएको छ । बोलेरो गाडी दूधकोशी नदी किनारमा खसेर दुर्घटना भएको हो ।
धरान ५ की ७ वर्षीया आशिका राई, ५० वर्षीय खानुहाङ राई, आमचोक गाउँपालिका १० का सफल राई, वीरबहादुर राई, ३० वर्षीय सुमन राई, ६ वर्षिया सृष्टि राई, ३१ वर्षीया सरस्वती राई, छ महिनाका बालक अनरुप राई घाइते भएका छन् । यस्तै बोलेरो चालक ३६ का प्रकाश राई, धरान १३ का १३ वर्षीय साईमन राई, १३ वर्षीया लिजा राई, धरान ५ की ३५ वर्षीया सृजना राई रहेका छन् ।