यमनी हुथी विद्रोहीहरूले आफ्ना २० कर्मचारीलाई अझै पनि हिरासतमा लिएका यमनस्थित संयुक्त राष्ट्रसङ्घको कार्यालयले आइतबार जनाएको छ।
हुथी सुरक्षा बलले उनीहरूको कार्यालय परिसरमा ‘अनधिकृत प्रवेश’ गरेको र त्यहाँका कर्मचारीहरूलाई विद्रोहीले नियन्त्रणमा लिएको राष्ट्रसङ्घको कार्यालयले शनिबार जनाएको हो ।
संयुक्त राष्ट्रसङ्घका आवासीय समन्वयकका प्रवक्ता जिन आलमले आइतबार भन्नुभयो, “पाँचजना राष्ट्रिय कर्मचारी र पन्ध्र अन्तर्राष्ट्रिय कर्मचारी परिसरभित्र हिरासतमा छन् ।”
“यो गम्भीर स्थितिलाई सकेसम्म छिटो समाधान गर्न सकियोस् भनी संयुक्त राष्ट्र सङ्घ, सानाका अधिकारीहरू र सम्बन्धित सदस्य राष्ट्रले र यमनको सरकारसँग सम्पर्क गरिरहेको र सबै कर्मचारीहरूको हिरासत अन्त्य गर्न र सानामा आफ्नो सुविधाहरूमा पूर्ण नियन्त्रण पुनस्र्थापित गर्न आग्रह गरेको छ।
विद्रोहीहरूले यसअघि नै अगस्ट ३१ मा सानामा रहेको संयुक्त राष्ट्रसङ्घको कार्यालयमा आक्रमण गरी ११ जनाभन्दा बढी कर्मचारीलाई हिरासतमा लिइसकेका छन् ।
ती कर्मचारीमाथि अमेरिका र इजरायलका लागि जासुसी गरेको आशङ्का गरिएको हुथीका एक वरिष्ठ अधिकारीले नाम उल्लेख नगर्ने शर्तमा एएफपीलाई बताए ।
संयुक्त राष्ट्रसङ्घका महासचिवका प्रवक्ता स्टेफेन दुजारिकले शनिबार जारी गरेको विज्ञप्तिमा भनिएको छ, “हामी हाम्रा ५३ जना सहकर्मीलाई जथाभावी हिरासतमा राखिएको निर्णयको अन्त्य गर्न आह्वान गर्दछाँैं ।”
विद्रोही नेता अब्देलमालेक अल–हुथीले बिहीबार टेलिभिजनमार्फत गरेको सम्बोधनमा आफ्नो सेनाले शत्रुको ’सबैभन्दा खतरनाक जासुसी सेल’ भत्काएको दाबी गरेका थिए ।
दुजारिकले आरोपलाई ’खतरनाक र अस्वीकार्य’ भन्नुभएको छ।
संयुक्त राष्ट्रसङ्घका दर्जनौँ कर्मचारीलाई शनिबार विद्रोहीले छापा मारी नियन्त्रणमा लिएका थिए। इरान समर्थित समूहको नियन्त्रणमा रहेको क्षेत्रमा हालैका महिनाहरूमासहायताका लागि काम गर्दै आएका कैयौँ कर्मचारी पक्राउ परेका छन् ।
सेप्टेम्बरको मध्यमा यमनमा संयुक्त राष्ट्रसङ्घ मानवीय समन्वयकलाई आधिकारिक रूपमा हुथी विद्रोहीहरूको कब्जामा रहेको राजधानी सानाबाट अन्तर्राष्ट्रिय मान्यता प्राप्त सरकारको अन्तरिम राजधानी एडेनमा स्थानान्तरण गरिएको थियो।
संयुक्त राष्ट्रसङ्घका अनुसार सन् २०२५ को अगस्ट ३१ यता संयुक्त राष्ट्रसङ्घका २१ जना कर्मचारी पक्राउ परेका छन् र यसमा पक्राउ परेका अन्तर्राष्ट्रिय गैरसरकारी संस्थाका २३ जना वर्तमान र पूर्व सदस्य पनि थपिएका छन् ।
दस वर्षको गृहयुद्धले अरब प्रायद्वीपको सबैभन्दा गरिब देशमध्ये एक यमनलाई विश्वकै सबैभन्दा खराब मानवीय सङ्कटमा धकेलेको संयुक्त राष्ट्रसङ्घले जनाएको छ।