काठमाडौं । नेपाली काँग्रेसको गुट विवाद महासमिति बैठकमा पनि देखिएको छ । ६ शुभेच्छुक संघसंस्थाहरुले महासमितिको बैठक बहिष्कार गरेका छन् । ट्रेड युनियन कांग्रेस, नेपाल शिक्षक संघ, नेपाल डेमोक्रेटिक लयर्स एसोसियसन, प्रजातान्त्रिक चिकित्सक संघ, सेन्टर फर डेमेक्रेटिक इन्जिनियर्स नेपाल (सिडेन) र नेपाल प्रेस युनियनले बैठक बहिष्कार गरेका हुन् ।

आफूहरूले पठाएका प्रतिनिधिहरूको नाम समावेश नगरिएको भन्दै यी ६ संघसंस्थाहरूले बैठक बहिष्कार गर्नु परेको उल्लेख गरेका छन् । पार्टीको विधानअनुसार केन्द्रीय अध्यक्षसहित एक संस्थाबाट तीन जना महासमिति व्यवस्था भए पनि त्यसो नगरिएको भन्दै बहिस्कार गर्ने संघसंस्थाहरुले जानकारी दिए । संस्थाका अध्यक्षलाई महासमितिमा आमन्त्रित सदस्य रहने गरी काँग्रेसले निर्णय गरेको थियो । ललितपुरको गोदावारीमा हिजोबाट सुरु भएको महासमिति बैठकमा आज देखि बन्द सत्र सुरु हुँदैछ ।