काठमाडौं । काठमाडौँको बौद्ध क्षेत्रमा ऐतिहासिक, धार्मिक र सांस्कृतिक महत्व बोकेको रोपाइँ जात्रा (घोनाइ) सुरु भएको छ। गाईजात्राको भोलिपल्ट मनाइने यो जात्रा मल्लकालदेखि नै निरन्तर रूपमा चलिआएको हो।

गाईजात्रा तथा रोपाइँ जात्रा मूल समारोह समितिका अनुसार, हिजो घिनतिङना कार्यक्रम सम्पन्न भएको र आज रोपाइँ जात्रा र ¥याली निकालिनेछ। यसमा हलगोरु, युवा बाउसे, युवा रोपार, बाल रोपार, हाँस्य–व्यङ्ग्य, युवा र बाल लाखे, झाँक्री, घोडा तथा विद्यालयका प्रस्तुती रहनेछन्। जात्रा बौद्ध स्तूप परिक्रमा गर्दै बौद्ध फूलबारी, बौद्ध गेट, पिपलबोट, टुसाल हुँदै पुनः बौद्ध गेटसम्म सम्पन्न हुनेछ।

आयोजक समितिका संयोजक जयमङ्गल लामाका अनुसार, यस वर्ष पनि विभिन्न विधामा सहभागीलाई प्रथम, द्वितीय, तृतीय र सान्त्वना पुरस्कारको व्यवस्था गरिएको छ। वडाध्यक्ष भुवन लामाले काठमाडौँ महानगरपालिका–६ बाट गाईजात्रा, रोपाइँ जात्रा र घोनाइ जात्रा भव्य रूपमा सम्पन्न गर्नका लागि १५ लाख रुपैयाँ विनियोजन गरिएको जानकारी दिए।

जानकारका अनुसार, सोह्रौँ र सत्रौँ शताब्दीदेखि नै रोपाइँ जात्रा मनाउने परम्परा रहेको छ। खेतीपाती सम्पन्न भएपछि खुसीयाली स्वरूप मनाइने यस पर्वमा घर–घरका सदस्य विभिन्न भेषभूषा र अभिनयसहित सहभागी हुने प्रचलन छ। बाजागाजासहितको ¥याली बौद्धस्तूप वरिपरिको सांस्कृतिक र ऐतिहासिक पहिचानको प्रतीकका रूपमा मनाइन्छ।