काठमाडौं:देशका पहाडी तथा हिमाली क्षेत्रमा आज (आइतबार) पनि वर्षा र हिमपातको सम्भावना रहेको छ ।

तराईका अधिकांश स्थानमा भने मौसम सफा रहने मौसम पूर्वानुमान महाशाखाले जनाएको छ । यद्यपि, तराईका केही स्थानमा बिहानपख हुस्सु लाग्ने सम्भावना छ ।महाशाखाका अनुसार पश्चिमी न्यून चापीय प्रणाली र मनसुनी वायुको प्रभावका कारण देशका विभिन्न क्षेत्रमा बदलीको अवस्था रहेको छ । हाल हिमाली क्षेत्रमा सामान्यतया बादल लागेको छ भने अन्य भू–भागमा आंशिक बदली देखिएको छ ।

आइतबार दिउँसो कोशी, बागमती र कर्णाली प्रदेशका पहाडी तथा हिमाली क्षेत्रका थोरै स्थानमा मेघगर्जन र चट्याङसहित मध्यम वर्षा हुन सक्नेछ । गण्डकी, लुम्बिनी र सुदूरपश्चिम प्रदेशका पहाडी तथा हिमाली क्षेत्रका एक–दुई स्थानमा पनि वर्षाको सम्भावना रहेको छ । तराई क्षेत्रमा भने मुख्यतः मौसम सफा रहने अनुमान छ ।राति पनि हिमाली तथा पहाडी क्षेत्रमा आंशिक बदली कायम रहनेछ । कोशी, बागमती र कर्णाली प्रदेशका हिमाली क्षेत्रका एक–दुई स्थानमा मेघगर्जन र चट्याङसहित हल्का वर्षा तथा हिमपात हुन सक्ने महाशाखाले जनाएको छ ।