दमौली । तनहुँको शुक्लागण्डकी नगरपालिका–११ स्थित वडा कार्यालयमा बुधबार आगलागी हुँदा करिब आठ लाख रुपैयाँ बराबरको क्षति भएको छ।

विद्युत् चुहावटका कारण कार्यालयमा आगलागी भएको वडाध्यक्ष शालिकराम भट्टराईले जानकारी दिए। उनका अनुसार आगलागीबाट करिब ७ लाख ९८ हजार रुपैयाँ बराबरको सामग्री नष्ट भएको छ।

आगोले कार्यालयका ९० वटा कुर्सी, ४ वटा दराज, सोफा सेट, टेबल र एउटा फ्रिज पूर्ण रूपमा जलेर नष्ट भएका छन्।

घटनापछि स्थानीयवासी र प्रहरीको सहयोगमा आगो नियन्त्रणमा लिइएको वडाध्यक्ष भट्टराईले बताए। आगलागीबारे थप अनुसन्धान भइरहेको जनाइएको छ।