साउदी अरबका अधिकारीहरूले इराकबाट प्रक्षेपण गरिएका ड्रोन आक्रमणका कारण महत्वपूर्ण तेल निर्यात मार्ग अस्थायी रूपमा बन्द गरिएको बताएका छन् ।
यो मार्ग इरानले होर्मुज जलडमरूमध्य बन्द गरेपछि वैकल्पिक रूपमा प्रयोग हुँदै आएको थियो ।मध्यपूर्वमा युद्ध सुरु भएपछि साउदी अरबले यान्बु बन्दरगाहसँग जोड्ने पूर्व–पश्चिम तेल पाइपलाइनको प्रयोग बढाउँदै आएको छ । होर्मुज जलडमरूमध्य हुँदै हुने तेल निर्यातमा अवरोध भएपछि यो पाइपलाइन साउदी तेल निर्यातका लागि महत्वपूर्ण वैकल्पिक मार्ग बनेको हो ।साउदी विदेश मन्त्रालयले रियाद र मदिना क्षेत्रमा रहेको पूर्व–पश्चिम पाइपलाइनलाई इराकबाट आएका धेरै ड्रोनले निशाना बनाएको जनाएको छ । आक्रमणका कारण केही मानिस घाइते हुनुका साथै भौतिक क्षति भएको मन्त्रालयले जनाएको छ ।साउदी ऊर्जा मन्त्रालयका एक अधिकारीले सरकारी समाचार संस्था एसपीएसँग कुरा गर्दै सावधानीका रूपमा पाइपलाइन सञ्चालन रोकिएको र आक्रमणबाट केही मानिस घाइते भएको बताए ।बिहीबार खिचिएका कोपरनिकस सेन्टिनेलका भूउपग्रह तस्बिरमा मदिनानजिकै कालो धुवाँको मुस्लो देखिएको थियो । उक्त क्षेत्र साउदी तेललाई लाल सागरको तटसम्म पुर्याउने पूर्व–पश्चिम पाइपलाइनको मार्गनजिकै पर्छ ।इराकका प्रधानमन्त्री अली अल–जैदीको कार्यालयले आक्रमण इराकी भूमिबाट भएको पुष्टि गरेको छ ।
साथै दक्षिणी प्रान्त मैसानका लागि जिम्मेवार सुरक्षा कमान्डरलाई पदबाट हटाइएको जनाएको छ ।इराकी सरकारले साउदी अरबमा भएको आक्रमणको निन्दा गर्दै आक्रमण इराकको एक प्रान्तभित्रको स्थानबाट भएको जनाएको छ ।साउदी अरबले तत्काल जवाफी कारबाही नगर्ने:साउदी अरबले इराकी प्रधानमन्त्रीको आग्रहमा तत्काल जवाफी कारबाही नगर्ने निर्णय गरेको जनाएको छ । इराकबाट साउदी अरब तथा छिमेकी देशमाथि हुने आक्रमण रोक्न इराकी सरकारले गरिरहेको प्रयासलाई समर्थन गर्ने रियादले जनाएको छ ।साउदी अरबले यसअघि पनि इरानसमर्थित इराकी मिलिसियामाथि आफ्नो तेल पूर्वाधारलाई निशाना बनाएको आरोप लगाउँदै आएको थियो ।यद्यपि साउदी सरकारले आफ्नो सार्वभौमिकता, सुरक्षा, पूर्वाधार र नागरिकको सुरक्षाका लागि आवश्यक सबै कदम चाल्ने अधिकार सुरक्षित रहेको स्पष्ट पारेको छ ।बहराइन, जोर्डन र कतारले पनि साउदी तेल पाइपलाइनमाथिको आक्रमणको निन्दा गरेका छन् ।
तेलको मूल्यमा वृद्धि:आक्रमण र मध्यपूर्वमा बढ्दो तनावका कारण यो साता अन्तर्राष्ट्रिय बजारमा कच्चा तेलको मूल्य प्रतिब्यारेल १०० अमेरिकी डलरभन्दा माथि पुगेको छ ।अमेरिकामा डिजेलको औसत मूल्य पनि शुक्रबार पहिलोपटक प्रतिब्यारेल ६ अमेरिकी डलरभन्दा माथि पुगेको बताइएको छ । यसले आगामी मध्यावधि निर्वाचनअघि अमेरिकी राष्ट्रपति डोनाल्ड ट्रम्पमाथि थप राजनीतिक दबाब पर्न सक्ने देखिएको छ ।यसैबीच, इरानसमर्थित यमनका हुथी विद्रोहीले साउदी अरबविरुद्ध समुद्री नाकाबन्दीको घोषणा गर्दै लाल सागरमा साउदी तेल बोकेका पानीजहाजमाथि आक्रमण गर्दै आएका छन् ।शुक्रबार हुथीहरूले यमनको लाल सागर तट र बाब अल–मन्दब जलडमरूमध्यका केही टापुमा आफ्नो नियन्त्रण थप बलियो बनाएको दाबी गरेका छन् । यो जलमार्ग युरोप र एसियाबीचको महत्वपूर्ण सामुद्रिक मार्ग हो ।हुथीहरूले पछिल्लो गतिविधिपछि बाब अल–मन्दब जलडमरूमध्यमा साउदी अरबबाहेक अन्य सबैका लागि समुद्री आवागमन सुरक्षित रहेको दाबी गरेका छन् ।