विराटनगर–३ मा कुकर भित्र इटाका टुक्रा भरेर बम जस्तो शंकास्पद वस्तु बनाएर राख्ने दुईजना पक्राउ परेका छन् । बम जस्तो बस्तु भेटिएपछि नेपाली सेनाको डिस्पोजल टोलीले डिस्पोज गरेको हो । तर कुकरभित्र इटा भरेर राखेको थियो ।
घरेलु तथा साना उद्योग कार्यालय छेउमा कुकरलाई टेपले बाँधेर राख्ने इलाम माङ्सेबुङ १ गजुरमुखी घर भई हाल काठमाण्डौं बस्दै आएका ३८ वर्षीय प्रविण मिश्र र पाँचथर याङवरक १ का ३० वर्षीय विपिन अधिकारीलाई मोरङ प्रहरीले पक्राउ गरेको हो । उनीहरुले निजी विद्यालय तथा विभिन्न क्षेत्रमा चन्दा आतंक मच्चाउँदै आएको गुनासो थियो । अझै आतंकित बनाउन उनीहरुले नै शंकास्पद वस्तु राखेको मोरङ प्रहरीका उपरीक्षक दिपक पोखरेलले जानकारी दिनुभयो । प्रहरीका अनुसार मिश्रको साथमा रहेको झोलामा ७ वटा डेटोनेटर, १८ फिट ३ ईन्च लम्बाईको डेडकर्ड, १ केजी सोडा र सहयोग रसिदको दुई वटा ठेली बरामद भएको छ । यस्तै सहयोगका लागि लेखिएको पत्र, मुक्तिनाथ प्रकाशन गृहको प्रेस आइडी कार्ड, डायरी र एनसेलका पाँच वटा सिम बरामद भएको छ । अधिकारीको साथबाट पनि मुक्तिनाथ प्रकाशन गृहको प्रेस आइडी कार्ड, सहयोग रसिदको ठेली, महासचिव महावीर नामको हस्ताक्षर रहेको सहयोग सम्बन्धी लेखिएको पत्र, डिजिटल स्टाम्पलगायत सामग्री बरामद भएको छ । पक्राउ परेकाहरुमाथि थप अनुसन्धान भइरहेको प्रहरीले बताएको छ ।