एजेन्सी: इरानको इस्लामिक रिभोलुसनरी गार्ड्स (आईआरजिसी)ले अमेरिकाले आफ्नो आक्रमणकारी गतिविधि नरोकेसम्म विश्वकै महत्वपूर्ण ऊर्जा पारवहन मार्गमध्ये एक होर्मुज जलडमरूमध्य नखुल्ने चेतावनी दिएको छ ।
साथै, अमेरिकासँग सम्बन्धित क्षेत्रीय तेल तथा ग्यास निर्यात मार्गहरू पनि निशानामा पर्न सक्ने जनाएको छ ।फेब्रुअरीको अन्त्यदेखि जारी अमेरिका–इरान द्वन्द्वका कारण खाडी क्षेत्रबाट हुने तेल तथा ग्यास ढुवानी प्रभावित भएको छ । विश्व ऊर्जा आपूर्तिको प्रमुख मार्ग मानिने होर्मुज जलडमरूमध्यमा अवरोध उत्पन्न भएपछि अन्तर्राष्ट्रिय ऊर्जा बजारमा समेत चिन्ता बढ्दै गएको छ ।इरानी सरकारी टेलिभिजन आईआरआईबीका अनुसार अमेरिकी आक्रमणको जवाफस्वरूप आईआरजिसीले बहराइन र कुवेतस्थित अमेरिकी सैन्य सुविधामाथि आक्रमण गरेको छ । त्यससँगै अमेरिकाको आर्थिक तथा रणनीतिक हितसँग सम्बन्धित समुद्री ऊर्जा मार्गहरू थप जोखिममा पर्न सक्ने चेतावनी पनि दिइएको छ ।आईआरजिसीले जारी गरेको विज्ञप्तिमा अमेरिकाले आफ्ना समुद्री गतिविधिमार्फत विश्वव्यापी तेल तथा ग्यास आपूर्ति शृङ्खलामा असर पार्ने प्रयास गरेको आरोप लगाइएको छ ।
त्यसको परिणामस्वरूप अमेरिकाका सहयोगी राष्ट्रहरूले प्रयोग गर्ने अन्य ऊर्जा निर्यात मार्गहरू पनि अवरुद्ध हुन सक्ने उल्लेख गरिएको भए पनि कुन–कुन मार्ग प्रभावित हुन सक्छन् भन्ने खुलाइएको छैन ।विज्ञप्तिमा ‘यस क्षेत्रबाट हुने तेल र ग्यास निर्यात या त सबैका लागि हुनेछ, या कसैका लागि पनि हुनेछैन’ भन्ने चेतावनी दिँदै अमेरिकाले आक्रमण नरोकेसम्म आफ्नो प्रतिकारात्मक कारबाही जारी रहने र होर्मुज जलडमरूमध्य बन्द रहने स्पष्ट पारिएको छ । उता, अमेरिकी अधिकारीहरूले भने इरानले होर्मुज जलडमरूमध्यमा पूर्ण नियन्त्रण कायम गर्न सक्ने दाबी अस्वीकार गरेका छन् । उनीहरूले अन्तर्राष्ट्रिय समुद्री ढुवानी मार्गहरू सुरक्षित र सञ्चालनमा राख्न आवश्यक सबै कदम चालिने बताएका छन् ।