विराटनगर : सुनसरीको दुहबी नगरपालिका–४ मालहट्टीस्थित बुढीखोलाको पुलबाट मोरङ घर भएका दुई जना युवा पक्राउ परेका छन् ।

इलाका प्रहरी कार्यालय दुहबी र लागुऔषध नियन्त्रण ब्यूरो विराटनगरको संयुक्त टोलीले मोरङको धनपालथान गाउँपालिका–१ नोचाका २५ वर्षीय जमालउद्धिन मियाँ र २५ वर्षीय इमदाद मियाँलाई पक्राउ गरेको हो । आइतबार राति ८ बजेतिर पक्राउ परेका उनीहरुको साथबाट लागुऔषध खैरो हेरोइन (ब्राउन सुगर) बरामद भएको प्रहरीले जनाएको छ ।

प्रहरीका अनुसार १०७ ग्राम ४ सय ५० मिलिग्राम ब्राउन सुगर बरामद भएको हो । इलाका प्रहरी कार्यालय दुहबीको हिरासतमा राखिएका दुवै जनाविरुद्ध लागुऔषध ऐनअन्तर्गतको मुद्दामा अनुसन्धान अघि बढाउने प्रहरीको तयारी छ । इन्स्पेक्टर शिवराम थापा नेतृत्वको टोलीले विस्तृतमा अनुसन्धान गरिरहेको छ ।