काठमाण्डौ : नेवार समुदायले आज सिथि नखः पर्व मनाउँदैछन् ।
जेष्ठ शुक्ल पक्ष षष्ठी अर्थात् कुमार षष्ठीका दिन आज कुमार कार्तिकेय र गणेशको पुजा गर्ने परम्परा छ ।सिथि नखःको दिन आज नेवार समुदायले वर्षा शुरु हुनु अघि पानीका स्रोतहरु सफा गर्ने परम्परा छ । आजका दिन पानीका मुहान, इनार, कुवा, पोखरी, धारालगायतका पानीको स्रोत सरसफाइ गर्छन् ।वर्षातको बेला बगेर आउने भेल र फोहर पानीले खानेपानीको मुहानमा मिसिएर पानी दूषित नहोस् भनेर पानीको मुहान र स्रोतको वरिपरि सरसफाइ गरी गर्नु नै यो पर्वको बिशेषता हो । यो पर्वसँगै वर्षा शुरु हुने र किसानले वर्षभरको महत्वपुर्ण काम धान रोपाइँ थाल्ने गर्छन् ।
यस पर्वलाई नेवार समुदायले वर्षको अन्तिम चाडको रुपमा समेत मनाउने गर्छन् । नेवार समुदायमा ऋतु अनुसारको चाडपर्व र चाडपर्व अनुसारका पकवान खाने प्रचलन रहेको छ । आजको दिन घरघरमा मास, मुग, केराउलगायत बिभिन्न अन्नको बारा र चामलको पिठोको चटामरी बनाएर खाने परम्परा छ ।