अस्ट्रेलियामा भएको एक दशक लामो अध्ययनले दैनिक २ घण्टाभन्दा धेरै सामाजिक सञ्जाल प्रयोग गर्ने किशोरकिशोरीहरूले डिप्रेशन लगायतका मानसिक रोगको उच्च जोखिमको सामना गर्ने गरेका पत्ता लगाएको छ ।
१२ देखि १८ वर्षको उमेरमा उच्च सामाजिक सञ्जालको प्रयोगले १ वर्षपछि मानसिक स्वास्थ्य समस्यामा वृद्धि भएको देखिएको अस्ट्रेलियाको मर्डोक चिल्ड्रेन रिसर्च इन्स्टिच्युट (एमसीआरआई) को प्रतिवेदनलाई उद्धृत गर्दै चिनियाँ समाचार संस्था सिन्ह्वाले जनाएको छ ।अस्ट्रेलियाको मेडिकल जर्नलमा प्रकाशित यस प्रतिवेदनले मेलबर्नमा ९ देखि १९ वर्ष उमेर समूहका झन्डै १ हजार २०० जना सहभागीको बीचमा अध्ययन गरेको थियो । अध्ययनका लागि एमसीआरआईले सन् २०२५ मा १६ वर्षमुनिका बालबालिकाका लागि सामाजिक सञ्जालको पहुँचमा प्रतिबन्ध लगाउनुअघि तथ्याङ्क सङ्कलन गरेको जनाएको छ ।अनुसन्धानकर्ताहरूले उच्चस्तरको मानसिक स्वास्थ्य समस्या, साइबर बुलिङ र सामाजिक सञ्जाल प्रयोगसँग सम्बन्धित हानिकारक अनलाइन सामग्रीको सम्पर्कले व्यापक चिन्ता बढाएको बताएका छन् ।
अध्ययनका अनुसार यसको प्रभाव १२ देखि १३ वर्ष उमेर समूहका किशोरीहरूमा सबैभन्दा धेरै देखिएको थियो । यद्दपि किशोरकिशोरी दुवैमा उच्च जोखिम देखिएको अध्ययनमा उल्लेख छ ।अस्ट्रेलियाको मर्डोक चिल्ड्रेन रिसर्च इन्स्टिच्युट (एमसीआरआई) को अघिल्लो अनुसन्धानले झन्डै तीन चौथाइ अस्ट्रेलियाली किशोरकिशोरीहरूले मानसिक रोग तथा चिन्ताको अनुभव गरेको जनाएको थियो ।