इलाम । इलाम २ को रिक्त प्रतिनिधिसभा सदस्य पदका लागि नेकपा एमाले इलाम जिल्ला कमिटीले ६ जना आकांक्षीको नाम सिफारिस गरिएको छ । जिल्ला कमिटीले आकाँक्षीको नाम केन्द्रीय कमिटीलाई सिफारिस गरेको हो ।

आगामी वैशाख १५ गते हुने उपचुनावका लागि उम्मेदवार छनौट गर्न जिल्ला कमिटीका उपाध्यक्ष उदयबहादुर राईको संयोजकत्वमा बनाइएको कमिटीले बनाएको सूचीमा दिवंगत नेता सुवासचन्द्र नेम्वाङका कान्छा छोरा सुहाङ, रवीन्द्र सुवेदी, नरेन्द्र भट्टराई, देवी क्षेत्री दुलाल, बुद्धि खनाल र रिप्पल राईको नाम रहेको छ । तर उमेद्वारको टुंगो भने केन्द्रीय कमिटीले लगाउने छ ।

एमालेका तत्कालीन उपाध्यक्ष एवं संविधानसभा अध्यक्ष सुवासचन्द्र नेम्वाङको गत भदौ २६ मा निधनपछि यो क्षेत्र रिक्त छ । निर्वाचन आयोगले चैत २४ गतेलाई मनोनयन गर्ने मिति तोकेको छ ।