विनोद प्रकाश कायस्थ,पुर्व अध्यक्ष ,नेपाल तरुण दल
“महाभारतको युद्धमा विजय पाण्डव पक्षको भयो । तर , त्यो युद्धमा पाण्डव र कौरव पक्षका सयौँ महारथीहरुले वीरत्व प्राप्त गरे । धेरै धन जनको क्षति व्यहोर्नुपर्यो।अहिले नेपाली कांग्रेसभित्र चलेको महाभारतमा यस्तै क्षति व्यहोर्नु पर्ने पो हो कि भनेर गाउँ गाउँ / टोल टोलका असली कांग्रेसीहरू चिन्तित देखिन्छन् । समय छँदै नेतृत्वले विचार नपुर्याउने हो भने न कांग्रेसमा असली कांग्रेस बाँकी रहन्छ , न कांग्रेस कमजोर भएकोमा दुःख मनाउ गर्ने शुभचिन्तक नै बाकी रहला जस्तो पो लाग्न थाल्यो।
हिजो पञ्चायती निरंकुशता र राजाको अधिनायकत्वको विरुद्ध लडेका , आफ्नो सम्पूर्ण यौवन र जीवन पार्टी र लोकतन्त्रका लागि समर्पण गरेका योद्धाहरूले बोल्नुपर्ने समय आएको जस्तो लाग्यो।
कांग्रेसमा अहिले पार्टी संगठनलाई कसरी जनताका बीचमा स्थापित गर्ने ? आगामी निर्वाचन होस् या आन्दोलन त्यसमा पार्टीको भूमिका कसरी प्रभावकारी बनाउने भन्ने विषयमा बहस हुन जरुरी देखिन्छ । पार्टीलाई विधान सम्मत चलाउने विधि र प्रक्रिया के हुनसक्छ,यस विषयमा बहस हुनु जरूरी छ ।
निर्वाचन होस् या आन्दोलन त्यसमा सम्पूर्ण पार्टी पंक्तिलाई कसरी परिचालित गर्ने भन्ने विषयमा छलफल गर्नु आज्को आवश्यकता हो। तर, दुर्भाग्यवश पार्टीभित्र आन्तरिक छलफल र बहस हुनुपर्ने विषय सामाजिक सञ्जाल र सडकमा पोखिनु कुनै ढंगबाट पार्टीको हितमा हुँदैन , हुनसक्दैन ।
पार्टीभित्र पटक पटक अवसर प्राप्त गरेका गरिरहेका नेताहरुको दन्त बजानले कुनै सार्थक निष्कर्ष निकाल्ने संकेत आजको मितिसम्म देखिएको छैन। त्यसैले विशेषत : संविधान सभाबाट निर्माण भएको वर्तमान संविधानको रक्षा गर्न कांग्रेसको वर्तमान नेतृत्व र सिंगो नेपाली कांग्रेसको केन्द्रीय समिति असफल देखिएकोले तत्काल वर्तमान केन्द्रीय समिति विघटन गरेर पार्टीको आगामी महाधिवेशन सम्पन्न गर्न पार्टीका सबै पक्षलाई मान्य हुने तदर्थ समिति गठन गर्नु अहिलेको टड्कारो आवश्यकता हो भन्ने मलाई लागेको छ ।
अहिले देशको समसामायिक राजनीतिक अवस्था, अहिलेका चुनौती , देशलाई विकास र समृद्धिको यात्रामा अगाडि बढाउनका लागि नीति र कार्यक्रमका बारेमा बहस गर्नका लागि तत्काल नीति महाधिवेशन र यसै महाधिवेशनबाट कांग्रेसको विधान परिमार्जन गर्न जरुरी देखिन्छ । विभाजित कांग्रेसले देशलाई निकास र विकास दिन सक्दैन । एकताबद्ध कांग्रेस अहिलेको आबस्यकता हो ।