काठमाडौं । नेपाली काँग्रेसका महामन्त्री गगन थापाले प्रधानमन्त्री पुष्पकमल दाहाल लगायत आफूहरुलाई गठबन्धनको काँध फेर्ने सुविधा नभएको बताउनुभएको छ ।

बिहीवार प्रतिनिधि सभा बैठकपछि सञ्चारकर्मीहरुसँग कुराकानी गर्दै महामन्त्री थापाले आफ्नो अनुकुलताका लागि गठबन्धनको काँध फेर्ने सुविधा नभएको बताउनुभएको हो । प्रधानमन्त्री दाहालले कपोकल्पित कुरा गरेर गठबन्धन परिवर्तन गर्नुभएको उहाँले बताउनु भयो । उहाँले प्रधानमन्त्रीले जति ढाकछोप गरेपनि बेइमानीको ढाकछोप नहुने बताउनु भयो । उहाँले यो सरकार लामो समय जान्छ भन्ने कुराको कसैलाई भरोसा नभएको बताउनु भयो ।

निर्वाचन अगाडी गठबन्धन गर्न नहुने भएपनि गठबन्धन गरिसकेपछि गठबन्धन तोड्न नहुने उहाँको भनाइ छ । एमाले अध्यक्ष केपी शर्मा ओलीलाई पनि कुनैपनि बेला प्रधानमन्त्री दाहालले धोका दिन सक्ने भन्ने कुरा मनमा खेलिरहेको हुन सक्ने आफूलाई महसुस भएको थापाको भनाइ थियो । नेपाली काँग्रेस गठबन्धनलाई ०८४ सालसम्म लैजानका लागि प्रतिवद्ध रहेको उहाँको प्रष्टोक्ति थियो ।