काठमाडौं । प्रमुख विपक्षी नेकपा एमालेले संसद बैठक सुरु हुन साथ नाराबाजी गरेको छ । प्रतिनिधिसभा (संसद) को आज बसेको बैठकमा एमाले सांसदहरुले आ–अफ्नो स्थानमा उभिएर नाराबाजी गरे । उनीहरुले सभामुखको रुलिङ पालाना गर, दोषी मन्त्रीहरुलाई कारबाही गर जस्ता नारा लगाएका हुन् । एमाले सांसदहरुको नाराबाजीपछि संसद बैठक १५ मिनेटलाई स्थगित भएको छ ।

विपक्षी दलहरुले ६ फागुनयताका हरेक बैठकमा विवादमा मुछिएका मन्त्रीहरुको राजीनामा माग गर्दै आएका छन् । १३ पुसमा भएको बालकुमारी घटनामा भौतिक पूर्वाधारमन्त्री प्रकाश ज्वाला पनि दोषी रहेको प्रतिवेदन जाँचबुझ समितिले बुझाएपछि विपक्षीहरुले उनको राजीनामा माग्दै आएका छन् । त्यो दिन प्रधानमन्त्री पुष्पकमल दाहाल प्रभण्डले प्रतिवेदन बुझेपछि अध्ययन गरेर कार्यान्वयन गर्ने संसदमा जवाफ दिने क्रममा बताउनुभएको थियो । तर अहिलेसम्म कसैलाई कारबाही नभएको भन्दै एमालेका सांसदहरुलै बैठकमा तीन मन्त्रीलाई बर्खास्त गर्न माग गर्दै आएका छन् ।