यमनस्थित हुथी विद्रोहीहरूले आइतबार इजरायलको दक्षिणी भागमा पर्ने रमान अन्तर्राष्ट्रिय विमानस्थलमा ड्रोन मार्फत आक्रमण गरेका छन् । इजरायली सेनाले यस घटनामा विमानस्थलका काँच फुटेको, एक जना व्यक्ति सामान्य घाइते भएको र केही घण्टाका लागि उडानहरू रोकिन पुगेको बताएको छ । विमानस्थलमा पुगेको क्षति सानोतिनो रहेकोले उडानहरू पुनः छिट्टै सञ्चालनमा आएका थिए । हुथी विद्रोहीहरूले यस आक्रमणको जिम्मेवारी लिएका छन् र यसलाई इजरायलमाथिको आफ्नो सैन्य अभियानलाई तीव्र पार्ने सन्देशका रूपमा व्याख्या गरेका छन् । हुथी सैन्य प्रवक्ताले ८ वटा ड्रोन प्रहार गरिएको बताउनुभयो । उहाँले इजरायलका विमानस्थलहरू सुरक्षित नभएको चेतावनी दिनुभएको छ ।
इजरायली सेनाले केही ड्रोनलाई रोक्न सफल भए पनि यस ड्रोनलाई समयमै नियन्त्रणमा लिन नसकेको कारणहरूको अध्ययन गरिरहेको जनाएको छ । हुथी विद्रोही र इजरायलबीच तनाव बढ्दो क्रममा इजरायलले यमनमा हुथी विद्रोहीहरूको प्रधानमन्त्री अहमद अल–राहावी र अन्य वरिष्ठ अधिकारीहरूको हत्या गरेको केही दिनमै हुथी विद्रोहीहरूले इजरायलमाथि आक्रमणहरू तीव्र पार्ने प्रतिज्ञा गरेका छन् । हुथी विद्रोहीहरूले आधुनिक हतियार तथा क्लस्टर बमको प्रयोग गर्दै इजरायलमाथि आक्रमण गरिरहेका छन्, जसले इजरायली सुरक्षा प्रणालीलाई चुनौती दिइरहेको छ । गाजा सिटीमा इजरायली आक्रमण तीव्र इजरायली सेनाले गाजा सिटीमा पनि आफ्नो आक्रमणलाई थप तीव्र बनाएको छ । आइतबार अल–रइया नामक सात तल्ले भवन ध्वस्त पारिएको छ, जहाँ विस्थापित फलिस्तीनीहरू बस्दै आएका थिए । इजरायली सेनाले उक्त भवनलाई हामासको खुफिया केन्द्र भएको दाबी गरेको छ, तर हामासले यो अस्वीकार गरेको छ । इजरायली सेनाले स्थानीय नागरिकहरूलाई सुरक्षित दक्षिणतर्फ सर्न अनुरोध गरेको छ । तर, धेरै विस्थापितहरू बारम्बार विस्थापनको कारण त्यहीँ बस्न इच्छुक देखिएका छन् ।
गाजा क्षेत्रमा अहिलेसम्म ६४ हजारभन्दा बढी मानिसहरू मारिएका छन्, जसमा महिलाहरू र बालबालिका पनि ठूलो सङ्ख्यामा छन् । इजरायली सर्वोच्च अदालतको महत्वपूर्ण फैसला इजरायलको सर्वोच्च अदालतले प्यालेस्टिनी कैदीहरूलाई पर्याप्त भोजन र आधारभूत जीवनयापनको व्यवस्था गर्न सरकारलाई निर्देशन दिएको छ । यो फैसला मानवअधिकार समूहहरूको निवेदनमा आएको हो, जसले कैदीहरूमा कुपोषण भएको उजुरी गरेका थिए । यो निर्णयले इजरायलमा युद्ध नीति सम्बन्धी कानुनी पक्षमा महत्वपूर्ण प्रगति मानिएको छ र अन्तर्राष्ट्रिय रूपमा प्रशंसा पनि प्राप्त गरेको छ । अमेरिकी राष्ट्रपति ट्रम्पको दाबी अमेरिकी राष्ट्रपति डोनाल्ड ट्रम्पले सामाजिक सञ्जालमार्फत इजरायलले आफ्नो शान्ति प्रस्ताव स्वीकार गरेको र अब हामासले पनि सहमति जनाउनुपर्ने बताउनुभयो । उहाँले यसलाई आफ्नो ’अन्तिम चेतावनी’ भन्नुभएको छ । तर, इजरायली अधिकारीहरूले यस दाबीको पुष्टि गरेको छैन । हामासले भने अमेरिकाबाट केही प्रस्तावहरू प्राप्त गरेको र युद्ध अन्त्य गर्नका लागि कुनै पहललाई स्वागत गरेको जनाएको छ । तर हामासले पूर्ण इजराली फिर्ती र गाजाको स्वतन्त्र प्रशासनको मागमा कुनै सम्झौता नगर्ने स्पष्ट पारेको छ ।
