इजरायली ड्रोनहरूले दक्षिणी लेबनानमा इजरायलसँगको सीमा नजिकै संयुक्त राष्ट्रसङ्घीय शान्ति सेनाको नजिक चार ग्रेनेड खसालेका छन् । शान्ति सेना सडक अवरोध हटाउने कार्यमा संलग्न रहँदा गरिएको उक्त आक्रमणमा कोही पनि घाइते नभएको लेबनानी सेनाले बुधबार जनाएको छ । युनिफिलका नामले चिनिने संयुक्त राष्ट्रसङ्घीय शान्ति मिसनले मङ्गलबार बिहानको घटनालाई गत नोभेम्बरमा १४ महिनासम्म चलेको इजरायल–हिजबुल्लाह युद्धको अन्त्यपछि ‘शान्ति सेना र उनीहरूको सम्पत्तिमाथि भएको सबैभन्दा गम्भीर आक्रमण’ भनेको छ ।

       इजरायली सेनाले भने यसबारे तत्काल कुनै टिप्पणी गरेको छैन । – शान्ति सेनामाथि प्रत्यक्ष खतराः युनिफिल – युनिफिलका अनुसार इजरायली ड्रोनहरूले शान्ति सेनाको नजिकै चार ग्रेनेड खसालेका थिए । ती सैनिकहरू सीमा क्षेत्रमा रहेका संयुक्त राष्ट्रसङ्घीय स्थितिमा पहुँच सहज बनाउन अवरोध हटाइरहेका थिए । एउटा ग्रेनेड २० मिटर भित्र र अन्य तीन करिब एक सय मिटर दूरीमा राष्ट्रसङ्घका कर्मचारी तथा सवारीसाधन नजिकै खसेका थिए । त्यसपछि ड्रोनहरू इजरायलतर्फ फर्किएको देखिएको छ । मारवाहिन गाउँको दक्षिणपूर्वी क्षेत्रमा शान्ति सेनाका लागि सडक खाली गर्ने कार्यबारे इजरायली सेनालाई पहिल्यै जानकारी दिइएको युनिफिलले जनाएको छ । तर घटनापछि सुरक्षाका कारण काम स्थगित गरिएको छ । राष्ट्रसङ्घीय सुरक्षा परिषद्को निर्णयपछि आक्रमण – गत हप्ता संयुक्त राष्ट्रसङ्घीय सुरक्षा परिषद्ले अमेरिका र इजरायलको दबाबमा पाँच दशकपछि अर्को वर्षको अन्त्यमा दक्षिणी लेबनानमा युनिफिल मिसन समाप्त गर्ने निर्णय गरेको थियो । उक्त निर्णयअनुरूप भएको आक्रमणले थप संवेदनशीलता सिर्जना गरेको छ ।

        दशकौँदेखि बहुराष्ट्रिय शान्ति सेनाले दक्षिणी लेबनानमा इजरायल–हिजबुल्लाह द्वन्द्वसहितको सुरक्षा अवस्थामाथि निगरानी गर्दै आएको छ । तर यस मिसनप्रति दुवै पक्षबाट आलोचना हुँदै आएको छ । विशेषगरी अमेरिकी राष्ट्रपति डोनाल्ड ट्रम्प प्रशासनका अधिकारीहरूले यसलाई आफ्नो विदेश नीतिको पुनःसंरचनासँगै अमेरिकाको कोष कटौतीको कारण देखाएका थिए ।  युद्धको मानवीय मूल्य – विश्व बैंकको तथ्याङ्कअनुसार इजरायल–हिजबुल्लाह युद्धमा लेबनानमा सयौँ नागरिकसहित चार हजारभन्दा बढीले ज्यान गुमाए भने ११ अर्ब डलर बराबरको क्षति भएको थियो । इजरायलमा ८० जना सैनिकसहित एक सय २७ जनाको मृत्यु भएको थियो ।  अन्तर्राष्ट्रिय कानूनको उल्लङ्घन – युनिफिलले राष्ट्रसङ्घीय शान्ति सेना र उनीहरूको सम्पत्तिमाथि खतरापूर्ण आक्रमण वा उनीहरूको कार्यमा अवरोध पु¥याउने कुनै पनि गतिविधि अस्वीकार्य रहेको बताएको छ । यस्तो कार्य अन्तर्राष्ट्रिय कानून र युद्धविराम प्रतिबद्धताको गम्भीर उल्लङ्घन हो । शान्ति सेनाको सुरक्षा सुनिश्चित गर्नु इजरायली सेनाको प्रत्यक्ष जिम्मेवारी भएको पनि युनिफिलले स्पष्ट पारेको छ ।