उदयपुर । उदयपुरगढी गाउँपालिका–७ मदन भण्डारी मार्गस्थित जोगीपोखरीमा सोमबार साँझ भएको ट्रक दुर्घटनामा एक जनाको मृत्यु भएको छ । एक जना घाइते भएका छन् ।
काठमाडौँबाट सुनसरीतर्फ जाँदै गरेको प्रदेश ३–०१००–६ख ०५६१ नम्बरको ट्रक दुर्घटना हुँदा गोठालोबाट घर फर्किरहेका रौतामाई–७ का ७२ वर्षीय टङ्कबहादुर लामिछाने मगरको घटनास्थलमै मृत्यु भएको जिल्ला प्रहरी कार्यालय उदयपुरका सूचना अधिकारी केदारमान दोङले बताए ।
दुर्घटनामा ट्रकका सहचालक दोलखा कालिञ्चोक–४ का ४० वर्षीय गोमे दर्जी घाइते भएका छन् । उनको जिल्ला अस्पतालमा उपचार भइरहेको प्रहरीले जनाएको छ ।
प्रहरीका अनुसार ट्रक चालक काभ्रेपलाञ्चोक बनेपा–१४ का ५४ वर्षीय नवराज राउतलाई नियन्त्रणमा लिइएको छ र दुर्घटनाबारे थप अनुसन्धान भइरहेको छ ।