विराटनगर:मोरङको रतुवामाई नगरपालिका–५ गोविन्दपुरस्थित बक्रा खोला बगरबाट प्रहरीले ठूलो परिमाणको लागूऔषध गाँजासहित दुई जना भारतीय नागरिकलाई नियन्त्रणमा लिएको छ ।
नियन्त्रणमा लिने क्रममा प्रहरीले गोली प्रहार गर्दा एक जना घाइते भएका छन् ।बिहीबार दिउँसो साढे १ बजेको समयमा लुकाइछिपाई राखिएको अवस्थामा ८ वटा सेतो बोरामा रहेको २६४.५९ केजी गाँजा बेवारिसे अवस्थामा फेला पारी बरामद गरिएको थियो । सोही स्थानमा पुनः लागूऔषधको कारोबार हुनसक्ने सम्भावनालाई ध्यानमा राख्दै इलाका प्रहरी कार्यालय सिजुवाबाट खटिएको गस्ती टोलीले राति पौने १० बजे केही व्यक्तिहरू गाँजा लिएर भारततर्फ जाँदै गरेको अवस्थामा फेला पारेको हो ।
प्रहरीले नियन्त्रणमा लिन खोज्दा भारततर्फ भाग्न खोजेपछि सुरुमा १ राउन्ड हवाई फायर गरिएको र त्यसपछि पनि नियन्त्रणमा नआएपछि चलाइएको १ राउन्ड गोली लागेर भारतको अररिया जिल्ला जोगबनी बस्ने ३९ वर्षीय प्रमोद चौधरी घाइते भएका छन् । उनको घुडामुनि पिँडुलामा गोली लागेको छ ।प्रहरीले चौधरीका साथै भारतकै अररिया जिल्ला महगामा ग्राम पञ्चायत थाना ४ बस्ने ५० वर्षीय राजेन्द्र प्रसाद यादवलाई थप १०० केजी गाँजासहित पक्राउ गरेको छ । पक्राउ परेका दुवै जनालाई इलाका प्रहरी कार्यालय सिजुवामा राखेर थप अनुसन्धान अघि बढाइएको जिल्ला प्रहरी कार्यालय मोरङका सूचना अधिकारी एवं प्रहरी नायव उपरीक्षक मकेन्द्र कुमार मिश्रले जानकारी दिए ।