भद्रपुर (झापा): पठन संस्कृतिको विकास तथा पुस्तक पढ्ने बानीलाई प्रोत्साहन गर्ने उद्देश्यले झापाको बिर्तामोडमा चौथो संस्करणको ‘किताब मेला २०८३’ आयोजना हुने भएको छ ।

इशा बुक सेन्टर बिर्तामोड, झापाली साहित्य समाज र साहित्य पत्रकार मञ्च बिर्तामोडको संयुक्त आयोजनामा असोज १६ देखि ३० गतेसम्म किताब मेला सञ्चालन हुन लागेको हो ।पछिल्लो समय पुस्तक पढ्नेको सङ्ख्या घट्दै गएको अवस्थामा पठन संस्कृतिको विकासका लागि मेलाको आयोजना गरिएको किताब मेला संयोजक केशवप्रसाद मैनालीले बताउनुभयो । “पुस्तक पढ्ने संस्कृतिको विकास र पाठकलाई विभिन्न विधाका पुस्तकसँग जोड्ने उद्देश्यले मेला आयोजना गरेका हौँ”, उहाँले भन्नुभयो ।

मेलामा पाँच हजारभन्दा बढी पुस्तक राखिने जनाइएको छ । विभिन्न विधा तथा उमेर समूह अनुसारका पुस्तकमा १० देखि ३० प्रतिशतसम्म छुटको व्यवस्था गरिएको संयोजक मैनालीले जानकारी दिनुभयो । मेलामा लेखकसँग संवाद, कविता तथा गजल वाचन, लक्की ड्रलगायतका कार्यक्रम पनि सञ्चालन हुने आयोजकले जनाएको छ ।