विराटनगर:विराटनगरको धार्मिक तथा सांस्कृतिक पहिचानसँग जोडिएको ५९(उनसट्ठी)औँ राधाकृष्ण रथयात्राको तयारी पूरा भएको छ ।

विराटनगर–१ स्थित राधाकृष्ण मन्दिरबाट हरेक वर्ष श्रीकृष्ण जन्माष्टमीको भोलिपल्ट निकालिँदै आएको रथयात्रा यस वर्ष भदौ २० गते शनिबार दिउँसो ३ः३० बजे निकालिने भएको हो । राधाकृष्ण रथयात्रा समारोह समितिले बुधबार पत्रकार सम्मेलन गर्दै रथयात्राबारे जानकारी दिएको हो। समितिका अध्यक्ष कैलाश रेग्मीका अनुसार यस वर्षको रथयात्रामा ५ लाखभन्दा बढी भक्तजन सहभागी हुने अपेक्षा गरिएको छ।यस वर्ष रथयात्रासँगै रसुवाको भोटेकोशी बाढीबाट प्रभावित नागरिकका लागि आर्थिक सहयोग संकलन गर्न तीन वटा दानपेटी पनि नगर परिक्रमा गराइने भएको छ । दानपेटीमा संकलन भएको सम्पूर्ण रकम बाढीपीडितको सहयोगका लागि उपलब्ध गराइने अध्यक्ष रेग्मीले बताए ।राधाकृष्ण मन्दिरबाट सुरु हुने रथयात्राले तीनपैनी चोक, गोल्छा चोक, मेनरोड, ट्राफिक चोक, रोडशेष चोक, महेन्द्र चोक, कोसी राजमार्ग, बरगाछी पूर्वतर्फ दुर्गा चोक हुँदै मन्दिरमा पुगेर रथयात्रा सम्पन्न हुनेछ । यात्राले ८ किलोमिटरको दूरी पूरा गर्ने छ । रथले ४४ स्थानमा विश्राम लिनेछ।

पत्रकार सम्मेलनमा बोल्दै जिल्ला प्रहरी कार्यालय मोरङका डीएसपी सन्तोष श्रेष्ठले रथयात्राको सुरक्षाका लागि व्यापक रूपमामा नेपाल प्रहरी र सशस्त्र प्रहरी परिचालन गरिने बताए । उनले रथयात्रामा सहभागी हुने भक्तजनलाई महँगा गरगहना लगाएर नआउन आग्रह गर्दै बालबालिका तथा वृद्धवृद्धालाई सकेसम्म नल्याउन अनुरोध गरेका छन् ।विक्रम संम्वत १९८८ सालमा राधाकृष्ण मन्दिरको स्थापना भएकै वर्षदेखि राधाकृष्णलाई ‘खट’ मा राखेर यात्रा निकाल्ने परम्परा सुरु भएको थियो । २०२५ सालमा रथ निर्माण गरी ‘खट यात्रा’ लाई रथयात्राका रूपमा निकाल्न थालिएको हो । पेगोडा शैलीमा निर्माण गरिएको रथ १९ फिट लामो, १४ फिट चौडाइ र २१ फिट ३ इन्च अग्लो छ । रथको जुवाको भाग ८ फिट रहेको छ । रथको अग्र भागमा जुवाबाट दायाँ र बायाँ १६५ फिट लामो डोरी रहेको छ । उक्त डोरी समाएर रथ तान्दा मनोकांक्षा पूरा हुने धार्मिक विश्वास रहँदै आएको छ।रथयात्रामा विभिन्न जातजाति, धर्म, सम्प्रदाय र संस्कृतिको प्रतिनिधित्व गर्ने झाँकी तथा भजन मण्डली सहभागी हुनेछन् । नेपालसँगै भारतका विभिन्न स्थानबाट समेत लाखौँ भक्तजन रथयात्रामा सहभागी हुँदै आएका छन् ।